بارو دۆخ لە عێراق و هەریمی ئێمەدا


حوسێن کوردنەژاد , , سیاسەت



حوسێن کوردنەژاد

بارو دۆخ لە عێراق و هەریمی ئێمەدا  وای لێهاتووە کە حەسێب بۆ هەنگاو و رووداوی رۆژانە دەکرێ. لایەنی جیاوازی هاوکێشەکان زۆر زیاتر لە جاران بە راشکاویی قسە لە سەر ستراتێژیی خۆیان دەکەن. بۆیە کارتەکان روونن و موجاملە لە سیاسەت دا جێ لێ تەنگ بووە. ئەمە وای کردووە کە  ئێستا زۆر زیاتر لە جاران قسەکان بە راشکاویی بگۆترێن و پێشبرکە لە  کۆکردنەوەی پشتیوانیی لە مەیدانی کردەوەدا تین و گورەێکی بەرچاوی بە خۆیەوە بینیوە: ئەوەی ئێمە دەبێ زیاتر خۆمانی پێوە ماندوو کەین؛

١.پشتیوانی زیاتر کۆ بکرێتەوە بۆ کێشەی رەوای خۆمان

٢.ئەوانەی پشتیوانی دەکەن زیاتر پابەند وبە کردەوە دەرگیر بکرێن

٣.ئەم دوو خالی سەرەوە زۆر زیاتر لە تەبلیغاتی خۆ بە سەربەخۆ نیشاندان، گرینگترە و دەبێ بخرێنە ئەجێندای کارەوە

گشت ئەمانە لە پێناو:

١.شکست هێنان  بە ستراتێژیی مەیدانی و کرداریی ئەو ولاتە یان لایەنانە کە وەک گەورە بەر بەستی ستراتێژیی کوردی خۆیان دەردەخەن.

٢.دەرگیر کردنی مەیدانی زیاتری تورکیا ، لە مەرحەلەی یەکەم دا بە پرسی کوردی رۆژئاوا ئەوە.

٣.راکێشانی هەر چی زیاتری لایەنە سیاسییەکانی هەریم بە تایبەت یەکەتی نیشتمانی بۆ ناو یاریی و هاوکاریی سیاسی

خالێکی گرینگ:

کار بکەین بۆ ئەوەی کە دنیا لەم راستییە تێبگات کە حکوومەتی یەکگرتوو لە عێراقدا سەر نەگرێ.

بە گۆێرەی ستراتێژیی کوردی کە خوازیاریی ئەوەیە کە ببێتە بەشێک لە ئابووریی جیهانی دەبێ کردەوەکانمان یارمەتیدەری سیاسەتی ئامریکا و دنیای پێشکەوتوو و بە راوێژ لە گەل ئەوان دا بێت.

ولاتی ئێران لە ناوچە دا و هەروەها لە ووت وێژەکانی خۆێدا لە سەر دۆسیەی ئەتۆمی، هەوڵ دەدات وەک بەربەستێکی سەرەکی داخوازییەکانی کورد خۆی دەربخات. ئێستا بەر لە کۆبوونەوەی وییەننا رەزامەندی نیشاندەدات بۆ لاچوونی مالکی و هەرەوها خوازیارە کەهاوکاری ئامریکا بکات لە دژی داعەش، لە لای ئێرانەوە ئەم هەنگاوانە بە گۆێرەی بەرژەوەندی خۆیان رەنگە راست و درست بن، بەلام هۆیەکەی هەرەس هێنان و شکستی ستراتێژیی ئێرانە لە عێراقدا و ئێستا ئامریکا دەبێ جەوری ئەم شکستە بکێشێ . ئێمەی کورد ناتوانین تەسلیمی سیاسەتی ئێران بین کە سوریای کرد بە ولاتی میلیشیات و ئێستا ئەوە خەریکە عێراق دەکاتە ولاتی میلیشیات و رەنگە هیوایان ئەوە بێ کە هەریم کوردستانیش بکەنە ولاتی میلیشیات.  کورد ئاوات و ئارەزویەکی تری لە سەردایە، ئاوادانی زیاتری دێوێ، پێشکەوتن و گەشەی ئابووریی زیاتری دێوێ، حکمرانی باشتر و سەربەخۆتری دێوێ و نێزیکایەتی دنیای دەرەوەی دێوی . بۆ ژیان لە عێراقی میلیشیات دا حازر نین. لە گەل جیرانەکانی هاوکاریی و رێزلە یەکتر گرتنی دێوێ. تەنانەت ئێران کە ئێستا خۆی وەک یەکەم دژبەری داخوازییەکانی کورد دەردەخات، کاتێک بگاتە ئەو قەناعەتە کە دەبێ رێز لە کورد بگرێ ئەو کات بۆی دەردەکەوێ کە دۆست و جیرانی باشتر لە ئێمەی دەست ناکەوێ.

بۆیە تازە درەنگ بووە، وەک بەرپرسان دەلەن؛ گەرانەوە بۆ دوایە نییە و ئێمەی کورد دەبی تەرکیز بکەین لە سەر:

سیاسەتی نەتەوەیی خۆمان بە بێ زیادەرەویی لە پرۆپاگاندای زۆر لە سەر دەستکەوتەکانەمان، کاری کرداریی بەر چاو لە سەر عەرزی واقێعدا بەکەین بۆ کۆکردنەوەی کورد، لەم خالەدا یەکریزیی لایەنە سیاسەکانی کوردی بە تایبەت یەکەتی نیشتمانی و بزووتنەوەی رۆژئاوا گرینگە.لەم خالە دا دەتوانین تەنانەت یارمەتی کرداریی و مەیدانی لە هاوپەیمانەکانمان داوا بکەین.

 هاوکات دەستەلاتی کوردی دەبێ ولاتیش بەرێوەبەرێ و لەم ئەرکەدا سەرکەوتووبێ بە تایبەت کە ئێستا بەرپرسییارییەتی ژیانی ژمارەیکی زۆر ناوچە تازە بە خەیر هاتووەکانیشی لە سەرە. پێشنیارێکی کلیلی بریتییە لە تووند وتۆل کردنی بوروکراسی ئیدارەی هەریم، بە رێگای وە کار خستنی تاسک فۆرس( گروپی تایبەت کە لە بەرپرسی یەکەی ئیداریی، چەند کەسی بە کاریی ئەو یەکەیە و یەک یان دوو پسپۆریی راستەقینە) لە گشت یەکە ئیدارییەکاندا، جا چ وەزارەت بن یان پارێزگا یان شارەوانی و ....

ئەرکی ئەم گروپانە بریتی دەبێ لە تێگەیشتنی بارو دۆخی ئەو یەکەیە،دەستنیشانکردنی ئەولەوییات ،بریاردان و جێ بە جێ کردن و بە دواداچوون.

چالاکییەکان